ክንክን ጥዕና

ኣብ ነዘርላንድ ካብ 18 ዓመት ንላዕሊ ዝዕድሚኡ ዝዀነ ይኹን ሰብ ናይ ጥዕና መድሕን ክህልዎ ኣለዎ። እዚ ግዴታ እዩ። ሓደስቲ ሰባት እውን መንበሪ ቤት ካብ ዝተዋህቦም እዋን ኣትሒዞም ናይ ጥዕና መድሕን ክህልዎም ግድን እዩ። 

ናይ ማሕበራዊ ጕዳያት ተሓባባራይካ ናይ ጥዕና መድሕን ኣብ ምውጻእ ክሕግዘካ እዩ። እዚ መድሕን እዚ ንመብዛሕትኡ እቲ ንሕክምና ኢልካ ተውጽኦ ገንዘብ ይኸፍላልካ እዩ። 

ኣንተደኣ ነቲ መድሕን ክትከፍል ዘይትኽእል ኮይንካ ንዑኡ መኽፈሊ ዝኸውን ተወሳኺ ገንዘብ ይኽፈለካ እዩ። ኣብዛ ገጽ እዚኣ ብዛዕባ ተወሰኽቲ ክፍሊታት ዝምልከት ዝያዳ ኸተንብብ ትኽእል ኢኻ። 

ናብ ኣርነም ክትነብር እንተ መጺእካ ኣብ እንዳ ሓኪም ትምዝገብ ኢኻ። እቲ እንዳ ሓኪም ኣብ ከባቢኻ ዝርከብ እዩ። ኣንተ ተጸሊኡካ ናብቲ ሓኪም ትኸይድ። ንኣብነት ኣካላዊ ወይ ስነ-ኣእምሮኣዊ ጸገማት እንተ ኣልዩካ። 

ኣብ እዋን ምሸት ወይ ቀዳመ-ሰናብቲ ኣብ ልዕሌኻ ወይ ኣብ ልዕሊ ገለ ካብ ኣባላት ስድራ ቤትካ ወይ ካልእ ሰብ ገለ ነገር እንተ ኣጋጢሙ ናብ መደበር ሕክምና ደውል። ናብ መደበር ሕክምና ክትድውል ዘለካ ክሳዕ ንጽብሒቱ ክትጽበ ዘይትኽእል እንተ ኾይንካ ጥራይ ኢኻ።

ኣብ ልዕሌኻ ወይ ኣብ ልዕሊ ኣብ ከባቢኻ ዘሎ ሰብ ኣብ ሞት ከብጽሕ ዝኽእል ጸገም እንተ ኣጋጢሙ ጥራይ ኢኻ ብቐጥታ ናብ ሆስፒታል እትኸይድ። ግን መጀመርታ ናብ ስልቂ ቑጽሪ 112 ክትድውል ኣለካ።

እቲ ምስ ሓኪምካ ተቛጺርካ ትገብሮ ርክብ ንዓሰርተ ደቒቕ ጥራሕ እዩ። ዝያዳ ግዜ ዘድልየካ ዀይኑ እንተ ተሰሚዑካ ቈጸራ ኽትገብር ከለኻ ክትሕብር ኣሎካ። ኣብቲ ቓለ-መጠይቕ እቲ ሓኪም እተፈላለየ ሕቶታት ይሓትት እዩ። ብዛዕባ ዘለካ ጥርዓናት እንታይ ኣረኣእያ ክም ዘሎካ እውን ይሓትት እዩ። እቲ ሓኪም ብዛዕባ እቲ እትነግሮ ነገር ንዋላ ሓደ ሰብ ኣይነግርን እዩ።

እቲ ሓኪምካ ክሕክመካ እንተ ዘይክኢሉ ሓድሓደ ግዜ ናብ ካልእ ሰብ የመሓላልፈካ እዩ። ንኣብነት ናብ ፊዝዮተራፒስት፣ ናብ ሓኪም ስነ-ኣእምሮ ወይ ተወሳኺ ምርመራ ንኽግበረልካ ናብ ሆስፒታል ይሰደካ ኢዩ። ድሕሪኡ ባዕልኻ ሓድሽ ቈጸራ ኽትገብር ትኽእል ኢኻ።

ናብ ኣርነም ንዝመጹ ሓደስቲ ሰባት ዝኸውን ፍሉይ ናይ ዝርርብ ክፍለ-ግዜ እውን ኣሎ፥ ረቡዕ ረቡዕ ድሕሪ ቐትሪ ካብ ሰዓት 1 ክሳዕ ሰዓት 3 ኣብ ዘሎ እዋን ናብ’ቲ ኣብ ሶንስበይክፓርክ ዝርከብ ኤ ቢቲፉል መስ (A beautiful mess) ዝበሃል ቤት መግቢ ብምኻድ ክትዘራረብ ትኽእል ኢኻ። ናይ ጥዕና ጸገም ምስ ዝህልወካ እውን ናብኡ ክትከይድ ትኽእል ኢኻ፣ ብዛዕባ ኣብ ነዘርላንድ ዘሎ ክንክን ጥዕና ዝምልከት ሕቶታት እንተለካ እውን ክትሓትት ናብኡ ክትከይድ ትኽእል ኢኻ። 

እዚ ናይ ዝርርብ ክፍለ-ግዜ ብናይ ዓለም ዶክተራት ዝተወደበ እዩ።